4 daga ferð um Aðalvík og Hesteyri

Gist í Stakkadal í Aðalvík. Báturinn var bara með þennan hóp. Gistingin var pöntuð hjá eiganda Stakkadals. Einnig er hægt að gista á tjaldstæðinu á Látrum.

Dagur 1

Brottför frá Ísafirði kl. 11.00. Siglt verður norður í Aðalvík og farið í land á Sæbóli í Aðalvík. Farangur fer áfram að Látrum eða að Stakkadalsósi.

Því þarf að pakka sérstaklega því sem á að fara að Látrum, þ.e. öllu sem ekki þarf að vera í dagspoka, s.s. svefnpoka, nesti til hinna daganna, hreinlætisvörum og þeim fötum sem þið hafið ekki í dagspoka. Í dagspoka þarf að vera nesti til dagsins, skjólflíkur, hælsærisplástrar og gott er að hafa auka sokka.

Farangur sem fer áfram í Látra þarf að vera vel merktur bæði einstaklingi og STAKKADAL. Skynsamlegt er að hafa hann í vatnsheldri pakkningu.

Farið verður um Sæból og gengið inn að Stað, inn með Staðarvatni og upp Fanndalalágir. Síðan niður í Miðvík og út fyrir Mannfjall og upp í Stakkadal sem er inn með Mannfjalli. Vegalengd 15 - 16 km.

Dagur 2 og 3

Annan daginn verður farið á Straumnesfjall að mannvirkjum bandaríkjahers. Þaðan niður í Rekavík bak Látur og gengið til baka í Stakkadal.

Hinn daginn verður svo gengið til Hesteyrar, þorpið skoðað og svo gengið til baka sömu leið.

Hvað við gerum hvorn daginn fer eftir veðri, það skiptir meira máli að fá bjart á Straumnesfjalli því þar er farið hærra.

Dagur 4

Gengið verður um Aðalvík, leiðarval háð aðstæðum þann daginn.

Brottför frá Látrum um kl. 17. Komið til Ísafjarðar kl. 19.